Oarsoaldeko Hitza

Madalenak gero eta gertuago daudenez, Udaletik egitarauak izango dituen ekitaldi nagusien berri eman dute. Musika, dantza, kirola eta kultura izango dira aurtengo festen osagai nagusiak.

Hilaren 21ean, Madalen bezperan, hasiko dira urtero bezala Errenteria-Oreretako festak. Egun horretako txupinazoa Reyes Karrere eskubaloi entrenatzaileak eta Maria Jesus Fonbellida Tatus sukaldariak botako dute.

Hilaren 22rako, berriz, ohiko prozesioa berreskuratuko dute. Iaz, parrokiko lanak zirela-eta bertan behera gelditu zen prozesioa. Aurten, ordea, prozesioa berreskuratzea erabaki dute, nahiz eta ez den ohiko ibilbidetik egingo. Madalena ermitatik Fatimako Andra Maria Elizaraino eramango dute Maria Madalena birjinaren irudia. 10:30ean izango da ekitaldia.

Danborren Jaia

Hilaren 22ko beste berrikuntza bat Danborren Jaia izango da. 18:00etan, Alabergako Plazatik irtengo dira erraldoi eta buruhandiak, zanpantzarrak, txistulariak, trikitilariak, dantzariak, txarangak eta Fanderia-Gabierrota, Telleri Alde, Agustinak, Koldo Mitxelena eta Galtzaraborda haur danborradak. 500 haur inguruk hartuko dute parte festan.

Ordubete geroago, zezen plazan, I. Uztai Errekortadore Txapelketa egingo dute. Halaber, 23:00etan, Sorkun& Vicepresidentes taldeak kontzertua emango du Maria Lezo kalean.

Hilaren 23an, Koadrilen Eguna

Hilaren 23rako Koadrilen Eguna antolatu dute Txosna Batzordekoek, eta egunean zehar hainbat ekitaldi izango dira, besteak beste, Kalderete Lehiaketa.

Nolanahi ere, hilaren 23koa kirolari estu lotutako eguna izango da. Goizean, Idi Demen XXX. Madalen Saria jokatuko da. Arratsaldean, berriz, goi mailako pilota partidak izango dira Fanderia pilotalekuan. Jaialdiko partida nagusian, Titin III.a- Goñi III.a eta Gonzalez-Barriola bikoteak izango dira aurrez aurre. Eguna bukatzeko Los del Gas taldeak kontzertua emango du Xabier Olaskoaga plazan.

Hilaren 24rako, Haurrentzako I. Krossa antolatu dute. Koldo Mitxelena plazatik aterako da, 10:00etan. Arratsaldean, berriz, Muxikoak dantzatzeko aukera izango da Panierreko Txokoan. Gauean, azkenik, Soilik, Kum, Lisabo eta Legen Beltza taldeen kontzertua izango da Agirre Lehendakaria Plazan. Xabier Olaskoaga plazan, berriz, Pantxoa eta Peio bikote mitikoak joko du.

Hilaren 25ean, azkenik, Bertso saioa, Madalenetako Slot Txapelketa eta Gipuzkoako Dantza Solte Txapelketa izango dira. Musika Bandaren ohiko emanaldiak agur esango die madalenei.