Oarsoaldeko Hitza

Lezoko Udaleko Gizarte Zerbitzuetako ordezkariek bilera egin zuten atzo arratsaldean Donibane kaleko Kultura Aretoan.

Batzarrean, Pildain Zentro Sozialaren inguruko azalpenak eman zituzten alde batetik, eta bestetik, Eguneko Zentro berriaren eta Auñamendi kalean babespeko etxebizitzak eraikitzeko egitasmoaren aurkezpena egin zuten.

Bileran ez zen erabakirik hartu, herritarrei zuzenduriko batzorde informatiboa baino ez zen izan.

Pildainen zergatik ez

Udalak ez du Eguneko Zentroa Lezoko bihotzean eraiki nahi. Atzo esandakoagatik, «herritar guztientzako bideraturiko zerbait egin behar da bertan». Leku horretarako kulturgune baten aurreproiektua egina du Udalak.

Horrez gain, aurreko legegintzaldikoUdalak aurkeztutako proiektua hainbat arazorengatik egokia ez dela deritzo.

Alde batetik, esleipen prozesua irregularra dela dio Udalak eta kokapen arazoez gain, finantzazio zein tamaina arazoak daudela; «handiegia da», esan dute.

Balorazio pertsonala egiteko, proiektuaren esleipena lortu zuen enpresarekin eta Aldundiarekin harremanetan jarri direla azaldu zuten bileran. Gerora plan geontologikoa egin zuten adinduentzako zerbitzuen gainean.

Udalak egindako txostenaren arabera, herrian zerbitzu hori eskaintzea «beharrezkoa eta premiazkoa» da. Horregatik, proiektu berria aurkeztu zuten Auñamendi aldean egiteko.



Auñamendiko proiektua

Zerbitzu soziala eskaintzea «beharrezkoa» dela eta Pildaineko proiektuak «sortzen dituen arazoak» ikusita, Udalak proiektu berri bat aurkeztu zuen atzoko bileran.

Eguneko zentroa egingo litzateke eta Auñamendi kalean eta babespeko etxebizitzak. Eguneko zentroan 30 bat pertsonentzako lekua egongo litzateke, eta zazpi edo zortzi izango lirateke babespeko etxebizitzak. Inbertsio totala, 1.010.000 eurokoa izango litzateke. Obrek sei hilabete iraungo lituzkete eta datorren urterako zentroa martxan egongo litzateke.

Udalak %100ean finantzatu dezake obra, atzo azaldutakoaren arabera. Pildaineko proiektuarentzako joan den urtean Aldundiak luzatutako diru laguntzari ezetz esan ostean, aurten, zentro berrirako diru laguntza eskatu dute berriro. Gipuzkoako Foru Aldundia bat dator proiektu berriarekin, baina ez du urte bukaerara arte laguntzarik emango.



Erabaki garrantzitsuak

Auñamendiko proiektua aurrera ateratzen bada, hainbat erabaki hartu beharko ditu Udalak. Lehenik eta behin, Pildaineko esleipena bertan behera utzi beharko du, irregulartasunak daudelako. Aurrekontuetan ere aldaketak egin beharko ditu, beraz.

Proiektu berriaren esleipena udara ondoren erabakiko da eta baita zentroa martxan jartzeko zerbitzua ere. Erabaki horiek guztiak hilaren 17ko ez ohiko udalbatzarrean hartuko dituzte.