Oarsoaldeko Hitza

Sogefi-Filtratrion enpresako langileen batzordea eta enpresak izendatu duen abokatuen enpresa, Sunion, langileentzako kalte-ordainak negoziatzen hasi dira.

Herenegun, bigarren aldiz egin zuten elkarretaratzea langileek Donostiako Gros auzoko Txofre plazan, Suniongo abokatuen bulegoaren aurrean.

«Enpresak ez du aurpegia ematen»

Enpresak hartu duen jarrera gaitzetsi dute langileek eta sindikatuek. «Enpresak ez du aurpegia eman nahi, eta dena egiteko eskumena eman dio Sunioni», azaldu dute LABetik.

Langileek «enpresa errentagarria» dela aldarrikatzen dute, «baina azken urtetan ez da inbertsiorik egin hemengo lantegian, eta dena pixkanaka Bartzelonara bideratu nahi izan da».

Bartzelonako egoitzan ere, 11 langile kaleratu ditu enpresak. «Trikimailua izan da Oiartzungo enpresa errazago ixteko», salatu dute langileek.

Langileek adierazi dutenez, «denborarekin lan-karga Frantziara eta Eslobeniara eraman nahi dituzte».

Eskaintza eta eskaera, ezberdinak

Langileak ez daude ados enpresak egin duen eskaintzarekin: langileek 75 eguneko kalte-ordaina eskatzen dute urteko; enpresak, berriz, 53 egun eskaini dizkie, gehienez 20 hilekotan.

«Justua da guk hau eskatzea», diote langileek, «errentagarria den enpresa bat itxi nahi dutelako eta gu kalera bidali nahi gaituztelako».

Ixteko erabili dituzten datuak «gezurra» direla ere salatu dute langileek: «Enpresak iaz 3,5 milioi euroko irabaziak izan zituela dio, bederatzi milioi euro irabazi zituenean».

78 langile, kalean

78 langile geldituko dira kalean Ugaldetxon kokatuta dagoen Sogefi-Filtration enpresa ixten bada; hauetariko gehienak emakumeak dira.

Langileen adina, bataz bestean, 35 urtekoa da. «Oso langileria gaztea dugu», diote.