Oarsoaldeko Hitza

Aurten bigarren urtez, Aqua Latino ikastaroa egiteko aukera dago Altzate igerilekuan. Goizero hamar lagun, guztiak emakumeak, ordu betez samba eta merenguea dantzatzen aritzen dira.

Egun on! Zer, dantzatzeko gogoz etorri al gara?». Galdetu du irakasleak. «Bai, bai, ni liluraturik nator!» erantzun du ikastaroa egiten ari den emakume batek. Bainu jantzia eta bainurako txanoa jarri eta ale, uretara.

Astearte eta ostegun guztietan bezala, goizeko 09:45erako ikasle guztiak uretan dauzka irakasleak dantzatzen hasteko prest. Gerria mugitzeko asmoz, hamar emakumez osaturiko talde jator bat elkartzen da egunero samba eta merengue erritmoak dantzatzeko intentzioarekin.

Adin guztietakoak daude, baina guztiak bizi-biziak dira, gorputza goitik behera mugitzeko prest dauden horietakoak. Lu Gonzalez irakasleak aipatu duen bezala, «mutilek normalean ez dute horrelako gauzetan parte hartzen» eta nabaritzen da ez dagoelako bat bera ere.

Hasteko, beroketa lasaia

Deskantsurik gabeko ordu bat daukate aurretik emakume martxosa hauek. Horretarako eta gorputza behar bezala mugitzeko, lehenengo ongi berotu behar da.

Hiru ilara osatu dituzte igerilekuan, bata bestearen atzean jarriz. Irakasleak musika aparailuari eman eta dantzatzera. Hasiera besterik ez denez, musika lasaia jarri du.

Lehenengo barre algarak eta irribarreak hasi dira nahiz eta berotzen baino ez diren ari. Alde batera lehenengo, gero bestera, aurrera, atzera...mila mugimendu mota. Hamar bat minutuz berotu ostean, onena hastear da...



Samba erritmoak jarraian

Lu Gonzalez irakasleak musika aldatu eta samba erritmo biziak jarri ditu. Gero eta erritmo biziagoak ari dira dantzatzen. Beraien arteko txantxak ere handituz doaz.

Gonzalez ere serio jarri eta klasea zuzentzen hasi da. Animoak eta oihuak ematen ditu denbora guztian. «Bat, bi, hiru, lau, gora! Bat, bi, hiru, lau, behera! Benga neskak, mugitu, mugitu, mugitu, gelditu gabe!» oihukatzen du.

Oso umore onekoak dira ikasleak, beraien artean gainera giro ezin hobea daukate. Koreografia ezberdin asko ari dira dantzatzen barre algara tartean. Uretan sartzeko gogoa ematen dio bati.

Irakasleak gauza bat esan eta ikasleek beste zerbait egiten dute, nahiz eta saiatzen diren. Ez da batere erraza uretara egokitutako samba zein merengue erritmo latino hauek uretan dantzatzea.

Ideia bat egiteko, Ronaldinhok gola sartzean egiten dituen mugimendu berberak dira, baina ur azpian.



Amaitzeko merenguea

Ikastaroari bukaera emateko merengue erritmoak jarri ditu irakasleak. Mugimendu ezberdin gehiago eta forma ezberdinetan. Borobilean, bi ilaratan, hiru ilaratan, txaloak joaz...

Uda garaian praktikatzen den kirol alternatibo hau, gerria eta zangoak indartzeko da, uretan erresistentzia lantzen den bitartean. Izan duen arrakasta ikusita ziur gaude, datorren urtean ere, Aqua Latino ikastaroa egitera hurbilduko direla batzuk, uretara egokitutako dantza latinoak dantzatzeko intentzioarekin.