Oarsoaldeko Hitza

Antxon oraindik indarrak berreskuratu gabe daudenean iritsi zaie festarako txanda trintxerpetarrei. Gaur hasiko dira karmenak, 20:00etan ospatuko den txupinazoarekin. Andres del Pozo Garciak eta Rosario Chico Sinovasek izango dute aurten jaien hasierako suziria pizteko ohorea, baraiek izendatu baitituzte aurten Alkate eta Alkate Andre. Ordurako zain izango dituzte herritarrak Euskadi Etorbidean, jaietan bete-betean murgiltzeko esperoan. Suziria eztanda egitearekin batera, ikurrina altxatu eta enkartelada dago deituta, herriko presoen alde.

Hauen aurretik, baina, izango dira bestelakoak. Goizean erretiratuen eskulanen erakusketa inauguratuko dute, haien egoitzan, eta arratsaldean haurrentzako jolasak eta askaria izango dira Azkueneko pistan. Handik abiatuko dira geroxeago buruhandiekin eta erraldoiekin, kalejiran, Alkateordetzarantz.

Jaiak ofizialki hasi baino ordu erdi lehenago, aurtengo karmenetan omendutako guztiei plakak emango dizkiete liburutegian, ekitaldi ofizialean.

Danborrada tradizionala, bostetatik lehena

Bi afari antolatu ditu Jai Batzordeak jaietako lehen egunerako; kantu afaria Gudarien Enparantzan izango da, eta, pilotalekuan sagardotegi menua eskainiko dute.

Afaldu ondoren jaietako lehen danborrada irtengo da: Ur-Gaiñ Elkarteak urtero antolatzen duen danborrada tradizionala. Aurten, gainera, urte berezia du Elkarteak, sorreraren 50. urteurrena ospatzen ari baitira. Danborradan, besteak beste, Jose Elberdin musikagile pasaitarrak Elkartearentzako propio sortutako ereserkia interpretatuko dute.

Ondoko ibilibidea egingo du danborrada tradizionalak: Euskadi Etorbidea , Serafín Esnaola plaza, Gudarien Enparantza, Euskadi Etorbidea, Jaizkibel kalea, Azkuene kalea, Euskadi Etorbidea eta Alkateordetza.

Mariatxiak eta rocka

Jada gauean, musika izango da protagonista. Gudarien Enparantzan rock kontzertua izango da, gazteentzat. Ondoko plazan, Serafin Esnaolan, aldiz, doinu mexikarrak nagusituko dira, Mariachi Juvenil Veracruz taldearen eskutik. Mariatxi talde berbera, arratsaldean, txupinazoaren ondotik, kalez kale ariko da, jaietako lehen orduak girotzen.