Oarsoaldeko Hitza

Denboraldi bukaeragatik, kirolarekin zerikusia duten eragile ezberdinak bildu zituen herenegun udaletxean, Udalak kirol elkarteekin koordinazioa indartzeko duen egitasmoaren baitako batzarrean.

Bertan, kirol eragile bakoitzak denboraldiaren balorazioa egin zuen lehenik. Jarraian, ikasturte bukaerako diru-laguntzen egoera zein zen azaldu zen eta datorren denboraldirako diru-laguntzen plegua zein zen aurkeztu zuten Gobernu Taldeko kideek. Azkenik, Udalak etorkizunerako hainbat proposamen planteatu zituen.

Arkaitz Angiozar, Udaleko Kirol teknikariaren arabera, «bilera oso positiboa» izan zen, jendeak «parte hartu» zuelako. Bileran, Udalaren eta kirol elkarte ezberdinen arteko kirol ikuspegi amankomuna bilatzen ahalegindu ziren, denon artean herri ikuspegia lortzeko. Hau lortu baino lehenago, ordea, kirol elkarteek«barne batasun eta komunikazioa sendotu», behar dutela jakitera eman du Angiozarrek.

Kirol eskolari ez

Udalak egindako proposamenik garrantzitsuena kirol eskolari ezezkoa esatea izan zen. Angiozarren iritziz, «kaltegarria da gure herriko gazteentzat. Gure iritziz, balore batzuk mantendu behar dira eta kirol eskolak ez ditu errespetatzen». Udalaren benetako apustua Eskola Kirola egitasmoa da eta beraz, «erabaki garrantzitsu asko hartzeko» daudela esan zuten Udaletik.