Oarsoaldeko Hitza

Herriko gazteen arteko harremana estutzea helburu duen Gazte Egunean, jai giroa eta umore ona izan da nagusi. Primeran pasatzeko ekintza ugari izan dituzte gazteek; Tailerrak, bazkaria, kontzertuak, karaokea...

Kateak apurtuz gazteak elkartu lelopean bildu dira Gazte Egunean, beste urte betez, Errenteria-Oreretako gazteak. Laugarren urtez jarraian elkartu dira, eta nola ez, azken urteetako giro berberaz gozatzeko parada izan dute gazteek.

Egun berezi honetarako prestaturiko egitarauari jarraituz, jaia Gaztetxean hasi zen. Festa eta katxondeorako giroan murgilduta, sexu eta txalaparta tailerran aritu ziren jolasean. Luis Elberdin sexologoak, sexu tabuez hitz egin zien gazteei. Parte-hartzaileetako bat, barrezka, ondoren esandakoagatik: «Teoria asko eta praktika gutxi, beti bezala».

Gaztetxetik, Foru plazan antolaturik zegoen ekitaldira zuzendu ziren gazteak, trikitilarien doinuak dantzatuz jeitsi ziren plazara. Bertan jende mordoa zegoen ekitaldia noiz hasiko zain. Txalaparta erritmo biziek, ekitaldia hasi zela ohartarazten zuten. Ereintzako dantzariek, ikurrina agurtu ondoren, bertsolarien txanda iritsi zen.

Bertso hunkigarriak

Gorka Etxeberria eta Xamoa izan ziren beraien bertsoekin plaza girotzen arduratu zirenak. «Euskal Herriak bizi duen errepresio egoera» salatu eta orain bi hilabete atxilotutako lagun gazteak izan zituzten gogoan. Hunkitu egin ziren han ziren gazteak bertsoak entzutean.

Lehen Gazte Egunean istripuz zendutako Ibon Zabala gogoratu zuten, eta ekitaldiaren bukaeran, Soto del Realen espetxeratuta dauden lagunen eskutitza irakurri zuten.



Topa egin eta bazkaltzera

Txanpaina banatu zuten plazan bildutakoen artean eta Gazte Egunean ez zirenak gogoratu zituzten. Eusko Gudariak abestuz bukatu zen ekitaldia.

Ordurako gosea zuten askok eta Esmalteria plazan antolaturiko bazkarira joan ziren. Zer nolako giroa!: Jan, edan, kantatu... Bat baino gehiago kaltetuta zebilen ordurako. Ondorengo sokatira, poteoa, kontzertua, eta azkenik, karaokerako askok iparra galduta zebiltzan, baina inork ez zuen etxera joateko gogorik.

Xamoak eguerdian kantatutako bertso batek zioen bezala «nahi duzuena egin zazue, baño ez txintxo portatu». Hala aritu ziren asko.