Oarsoaldeko Hitza

Itsasoa zakarra zegoen atzo bokalearen kanpoaldean, eta horrek are ikusgarriago egin zuen estropada. Hori gutxi balitz, haize aldaketa handiak izan ziren txanda batetik bestera, eta estropada erabat baldintzatu zuen.

Urdaibaik irabazi zuen estropada; bigarren sailkatu zen Castrori segundo bakarreko aldea atera zion. Orio izan zen hirugarren, Urdaibairen atzetik lau segundora, eta laugarrena eta bere txandako azkena, San Pedro, sei segundora.

Motel hasi ziren sanpedrotarrak, baina estropada eremuan aurrera egin ahala kontrarioekiko aldea murrizten joan ziren, batez ere bigarren eta laugarren luzeetan, hots, kanpoaldetik barrualdera.

Edonola ere, ezin izan zuten Urdaibai menperatu, eta ordura arte berea zuten lidergoa galdu egin zuten. Castro da orain sailkapeneko liderra.

Uholde morea

Kluba 50. urteurrena ospatzen ari da, eta kirol arloko emaitzek bat egiten dute ospakizunarekin. Morez jantzi zen atzo San Pedro. Herritarrek dena eman zuten atzo Libia animatzen. Nabari da zaleak ilusioa berreskuratu dutela, eta estropada irabazi ez arren, pozik eta itxaropentsu daude San Pedron, orain arte txukun ari baitira.

Odol kontrola, ustekabean

Estropada hasi baino lehen, ezustean odol kontrola pasatu behar izan zuten arraunlari guztiek. 16:00etan hasi ziren analisiak egiten, arraun egin behar zutenei, zein aurkeztutako besteei.