Oarsoaldeko Hitza

Pasaia, Errenteria-Orereta eta Lezo pertsonako errenta baxuena duten Gipuzkoako herriak dira. 16.000 eurotik beherako errenta dute hiru herriek, Gipuzkoako bataz bestekotik oso behera

Jose Luis Rodriguez Zapatero Espainiako presidenteak krisialdi hitza aipatu nahi ez duen arren, Oarsoaldeko herritarrek ondo baino hobeto ezagutzen dute hitz horren esanahia. Aspaldi iritsi zen krisialdia eskualde honetara, eta Gipuzkoako Aldundiak pertsonako errentari buruz emandako datuek baieztapen hori berretsi dute.

Oarsoaldea pertsonako errenta baxuena duen Gipuzkoako eskualdea da. Gipuzkoako Aldundiak jakitera eman dituen datuen arabera, Pasaiak, Errenteria-Oreretak eta Lezok 16.000 eurotik beherako pertsonako errenta dute.

Hain zuzen ere, Pasaia da Gipuzkoako pertsonako errenta baxuena duen herria. Pasaitarren pertsonako errenta 15.311 eurokoa da urtean. Zerrenda horretan, Errenteria-Orereta eta Lezo daude bigarren eta hirugarren postuan, hurrenez hurren.

Donostialdea, zerrendaren beste puntan

Gipuzkoako pertsonako errentari dagokion zerrendan, Donostialdea dago sailkapenaren buruan. Donostialdeko herritarrek 26.505 euroko pertsonako errenta dute. Alegia, Oarsoaldekoek baino 10.000 euro gehiago.

Nolanahi ere, pertsonako errenta handiena duen herria Abaltzisketa da. Herri honetako pertsonako errentak %37 egin du gora azken urtebetean. Gipuzkoako Aldundiak emandako datuen arabera, 27.629 euroko pertsonako errenta dute abaltzisketarrek.

Zerrenda honen bigarren tokian lehen aipaturiko Donostia dago, eta, hirugarrenean, Hondarribia.

Errenta «homogeneoa» dela azpimarratu du Aldundiak

Abaltzisketaren eta Pasaiaren arteko aldea 12.318 eurokoa den arren, Gipuzkoako herrien pertsonako errenta «homogeneoa» dela azpimarratu du Gipuzkoako Aldundiak. «Batez besteko pertsonako errenta 20.980 eurokoa da Gipuzkoan, eta herrien artean ez dago aparteko ezberdintasunik», azaldu dute.

Nolanahi ere, datuak begiratuz ondorio garbi bat atera daiteke. Kostaldeko herriek pertsonako errenta altuagoa dute. Donostia, Hondarribia eta Zarautz dira horren adibide garbiena. Aldunditik azaldu dutenez, «kostaldeko herrietara errenta altua duten herritar asko joaten dira bizitzera, eta horrek herri hauetako errenta handitzen du. Horregatik daude sailkapenaren buruan».