Oarsoaldeko Hitza

Inguruan dauden eraikin guztiak bota zituztenetik denbora dezente pasatu den arren, Lobato etxeak zutik dirau oraindik. Ez dirudi, dena den, denbora askorako izango denik. Errenteriako-Oreretako Udalak eta Ibargain etxebizitza sustatzaileak, Altzateko gunean 262 etxebizitza eraikitzeko hitzarmena sinatu baitute.

262 etxebizitza horietatik, 52 babes ofizialekoak izango dira. Etxebizitzez gain, oinezkoentzako zein txirrindularientzako bide egokiak jarriko dituzte eta Lezo zein Errenteria-Orereta udalerrien beharrak aseko dituen aparkalekuak eraikiko dira.

Altzateko gune hau, Lezo eta Errenteria-Orereta bitartean dago. Hori dela eta, 2004. urtean bi udalek elkarlanerako hitzarmenana sinatu zuten.

Dena den, eraikuntza sektorearen krisia dela eta, urbanizazioa eraikitzeko prozesua moteldu egin da azken hilabeteetan. Lobato etxearen jabea etxe eraikuntza enpresa bat da, horregatik, baliteke eraiste prozesua pixka bat atzeratzea.

27 urte okupatuta

Aurten 27 urte beteko dira Lobato etxea okupatu zutenetik. Urte guzti hauetan ekintza ugari antolatu dituzte bertan. Hamaika kontzertu egin dira, festak, tailerrak, hitzaldiak... Bizitza eman diote bertan bizi direnek urte guzti hauetan erortzear den etxeari. Azken urte hauetan etxearen etorkizunarekin kezka handiak izan dituzte bertako biztanleek. Orain, aldiz, badakite etxearekin zer gertatuko den.