Oarsoaldeko Hitza

Maitane Azpeitia atletak jauzi hirukoitzeko Gipuzkoako Gazte Mailako errekorra hobetu zuen herenegun, 13 metroko jauzia eginez.

Egun batzuk lehenago, hilaren 9an, Gipuzkoako marka berdintzea lortu zuen, 12,90 metroko jauzia eginez. Egun gutxi behar izan ditu 10 zentimetro gehiagoko jauzia egiteko.

Marka berdindu eta hobetu, biak, Bartzelonan egin ditu 19 urteko atletak, parte-hartze libreko probetan. «Kontrol antzekoak dira, baina markak kontuan hartzen dituzte».

«Nire jauzirik handiena»

Azpeitiarentzako sorpresa izan da errekorra hobetu duela jakitea. «Badakit inoizko jauzirik handiena egin dudala, nire markarik onena, baina ez nekien Gipuzkoako errekorra hobetuko nuenik», azaldu du kirolari gazteak.

«Pozik» dago, hala ere, errekorra berea dela jakinda.

Espainiako Absolutu Mailako Txapelketarako helburuak

Ostiral honetan bertan, beste proba batean parte hartuko du, baita ere Bartzelonan.

Ondoren, Kanariar Uharteetara doa Espainiako Txapelketan parte hartzeko, Absolutu Mailan. «Hirugarren urtez parte hartuko dut maila honetan, eta dominarekin itzuli nahiko nuke», esan du Azpeitiak.

Absolutu Mailan, pista estalian parte hartu zuen neguan, eta domina bat eskuratu zuen. «Maila honetan dagoeneko domina lortu badut, berriz ere lortu dezaket», azaldu du Azpeitiak.

Tenerifeko atletismo proba, estadio irekian jokatuko dute atletek.

Marokora Espainiako selekzioarekin

Tenerifetik itzulitakoan, abuztuaren 2an Marokorako bidea hartuko du Maitane Azpeitiak, Gazte Mailako Espainiako selekzioarekin batera.

Frantziako, Italiako, Aljeriako, Marokoko eta Espainiako selekzioek topaketak egingo dituzte. «Duela lau urte hasi nintzen Espainiako selekzioarekin probetan parte hartzen, nire mailan, Gazte Mailan».

Selekzioen arteko topaketa bi egunetakoa izango da.

Urtebete Bartzelonan

Maitane Azpeitiak urtebete darama Bartzelonako Errendimendu Altuko Zentruan (CAR) entrenatzen.

Urtebete honen balantze «oso positiboa» egiten du atleta gazteak. Atletismoa, hala ere, ekonomiako ikasketekin partekatzen ditu, «ondo moldatu naiz bi gauzekin».