Oarsoaldeko Hitza

Asteburuko neketik errekuperatzeko, egun lasaia izan zuten atzo Trintxerpen. Goiza lo egiteko baliatu zuten trintxerpetarrek, ez baitzegoen ekitaldirik aurreikusita. Arratsaldean, berriz, iragarrita zeuden hiru jardueretan hainbat jende bildu zen.

Siesta egiteko denbora izan zuten etxeko txikienek 18:00etan Azkuenen bildu baino lehen. Haurrentzako tailerrak izan ziren bertan, eta ederto pasatu zuten.

19:30ean elizan bildu ziren adin guztietako bizilagunak. Karmengo Amaren Hirurrena egin zuten bertan. Karmengo Amaren Kofradiak eskaini zuen.

Ordu berean izan zen, baita ere, jende gehientsuena bildu zuen patata tortilla lehiaketa. Gernika plazan hainbat parte-hartzaile bildu ziren tortilla goxoena nork egin zuen erabakitzeko.

Tortilla lehiaketa

Aurretik, 19:15etik 19:30era bildu zituzten antolatzaileek parte hartzaileek egindako tortillak, plazako oholtzan. Parte hartzeko nahikoa izan zen tortilla eraman eta gutunazal batean tortilla egin zuenaren datuak sartzea. Anonimotasuna gordetze aldera, bai tortillari eta baita gutunazalari ere zenbakia jarri zieten Jai Batzordeko kideek.

Parte hartzeko gutunazala eta tortilla eramatearekin bakarrik nahikoa bazen ere, tortillek hainbat baldintza bete behar zituzten. Batetik, tortillak gutxienez arrautzak eta patatak izan behar zituzten, noski. Ohiko gozagarriak, tipula eta piperra alegia, onartu zituzten, baina ez beste osagairen bat zutenak.

Epaimahaia Arzakek eta jaietako alkateek osatu zuten. Aurkeztutako tortillak baloratu eta hiru sari eman zituzten. Epaimahaiak tortillak baloratu eta erabakia jakinarazi ostean, Jai Batzordeak pintxoak egin zituen tortillekin, eta salgai jarri zituzten.

Erromeria, tortilla jaisteko

Tripa gustura bete ostean, parte hartzaileek, zein tortillak probatzera joan zirenek, kirol pixka bat egiteko aukera ere izan zuten; Laja II taldearekin erromeria izan zen plazan bertan.

gaurko egitaraua