Oarsoaldeko Hitza

Sabecoko langileek, ELAk eta LABek greba egingo dute hilaren 21ean, 23an eta 24an. Hala, Auchan multinazionalarekin erabat blokeatuta dauden negoziazioak bultzatu nahi dituzte, lan baldintza berriak lortzeko bidean. Atzo ELAren egoitzan egindako agerraldian, gatazka gizarteratu egingo dutela azaldu zuten, herritar guztiek «errealitate gordina» jakin dezaten.

«Sabeco enpresak Espainia mailako Hitzarmen Kolektiboa ezartzean, Gipuzkoakoa aplikatu beharrean, sortu zen gatazka », azaldu zuten Iñigo Zubeldia eta Iker Callao ELAko eta LABeko zerbitzuetako arduradunek, hurrenez hurren. Sabecoko plantila osatzen duten 50 langileek hasieratik arbuiatzen zuten hitzarmen hori.

Hitzarmen hori ezarri izanak, langileek edukiko luketena baino % 25 eta % 30eko soldata txikiagoa izatea dakarrela adierazi zuten. «Horrez gain, astean 50 ordu gehiago egin behar dute lan Sabecoko langileek», gaineratu zuen Callaok.

«Zilegitasunik gabeko hitzarmena»

BM, Super Amara, Lidl, Eroski... eta gainontzeko supermerkatuekin alderatu zuen Collaok Sabecoko egoera. «Baldintza duinak dituzte Gipuzkoako Hitzarmena dutelako. Guri, berriz, inongo zilegitasunik ez duen hitzarmena aplikatu ziguten. Horri esker, ziur aski Gipuzkoako soldatarik baxuena izango dugu», azaldu zuten. «Badajozko Sabecoko langileek eta bertakoek soldata bera dute. Baina, etxebizitzak lau bider garestiagoak dira hemen. Bertako langileek ezin dute bakarrik bizi, ezin dituzte seme-alabak eduki... ia bazterketa sozial batera heltzen den egoera baten aurrean gaude», azaldu dute.

Kaleratuak izateko arriskuan

Ekintza horiek ekar ditzaketen ondorioen jabe direla azaldu zuten langileek. «Badakigu Sabecok ez duela inongo arazorik izango, behar izanez gero, 50 langile kaleratzeko. Baina ELAk eta LABek borrokan jarraituko dute», azaldu zuen Iñigo Zubeldia ELAko arduradunak.

«Oarsoaldeak gure egoeraren berri izan dezan nahi dugu; gatazka gizarteratu nahi dugu. Gainera, Errenteria-Orereta kontzientzia soziala duen herria da, eta gure egoera ulertuko duelakoan gaude», azaldu zuen ELAko kideak. Madalenetako greba egunez gain, beste zenbait ekintzetan ere hartuko dute parte Sabecoko langileek. «Elastikoak salduko ditugu, txupinazoan udaletxeko balkoian egongo gara... Kalean egingo dugu borroka gure eskubideen alde», gaineratu zuten. Bukatzeko,«prekaritate eta emakumearen aurkako gatazka» baten aurrean gaudela azaldu zuten. Baita negoziazioaren beharra azpimarratu ere.