Oarsoaldeko Hitza

Bukatu dira karmenak. Atzo gauerdian agurtu zituzten festak trintxerpetarrek, datorren urtera arte, zezensuzkoarekin. Hala ere, jaietako azken eguna izateko, ekitaldiak ez ziren falta izan, aurten jaietako egun handiak eta azkenak bat egin baitute denboran.

Karmengo Amaren egunez, urtero gertatu ohi den legez, eliza leporaino bete zen eguerdiko meza nagusiaren orduan. Marinelen omenez egiten dute meza Trintxerpen, eta arrantzaleek beren eguna dutenez, sekula ez dute huts egiten Karmengo Amaren eguneko mezara.

Bero sapa egiten zuen atzo eguerdian, eta elizako irteeran emakumezko asko abanikoak eskutan ikus zitezkeen, eliz barruan pasatu zuten beroaren seinale.

Meza bukatu bezain laster, baina, jai giroa nagusitu zen elizaren kanpoaldean. Ur-Gaiñ elkartekoei esker, txanpaina, olibak eta patatak dastatu ahal izan zituzten fededunek, doan.

Elizako atarian, bestalde, Pasaiako erraldoiak zeuden zain. Izan ere, Iñudea eta Mikeletea, barrutiko apaiz Javier Berzosaren zain izan ziren. Berzosak auto istripua izan zuen lehengo apirilean, eta ordutik osatze bidean da. Atzo bere eliztarren ondoan egon nahi izan zuen, eta herritarrek omenaldi xumearekin eta hunkigarriarekin eskertu zioten bere jarduna.

Esker onez azaldu zen Berzosa konpartsaren oparia jasotzerakoan, eta gogoratu zuen, berak batailatu zituela orain dela urte batzuk erraldoiak. Azaldu zuenez, Iñudeak Karmele izena du, Karmengo Amaren omenez; Mikeleteak Mikel izena duela esan zuen, eta bion semea, Inazio, Loiolako San Inaziori gorazarre egiteko.

Danborrada, badian barrena

Arratsaldean, Ama Birjina itsasoratu zuten, arrantzaleen aldeko lore eskaintza egiteko. Bitartean, danborrada kaian egon zen, Karmengo Ama berriro noiz lehorreratuko zain. Ehunka lagun izan ziren kaian, lore eskaintza ikusten, danbor hotsak lagunduta.