Oarsoaldeko Hitza

Josetxo Etxandi Eskuz Binakako Pilota Oroitaldiaren XXXIII. aldia abuztuaren lehenengo astean abiatuko da. Horiek horrela, txapelketan izena emateko deia egin du Allerru Elkarteak. Izan ere, Haur, Gazte eta Heldu Mailako pilotariek hilaren 31ra arteko epea izango dute izena emateko. Izen-ematea Txingurri tabernan egin behar da.

«Txapelketan parte hartu nahi duten pilotari guztiei izena emateko deia zabaldu nahi diegu. Gure asmoa ahalik eta pilotari gehien elkartzea baita», azaldu du Luis Santos Allerru Elkarteko kideak eta Oroitaldiko antolatzaileak.

Abuztuko lehenego astean 16 urtetik gorako pilotarien partidak hasiko dira. Afizionatuenak, berriz, hirugarren astetik aurrera jokatuko dira.

Iaz, 100 parte-hartzaile inguru izan ziren

Josetxo Etxandi Pilota Oroitaldia jende asko erakartzen duen txapelketa da. Iaz, 100 pilotari inguruk parte hartu zuten. Ikusleak, halaber, asko izan ziren. «Pilotalekua jendez gainezka ikustea normala izaten da, batez ere, finaletan», azpimarratu du Santosek.

Bekoerrrota kiroldegiko pilotalekuan

Josetxo Etxandi Oroitaldiko partida guztiak Bekoerrota kiroldegiko pilotalekuan jokatuko dira. Antolatzaileek jakinarazi dutenez, partidak ikusteko sarrerak doan izango dira. Maila bakoitzeko txapelketako irabazleei txapelak eta oroigarriak emango dizkiete .