Oarsoaldeko Hitza

Oiartzun Autoeskolako Asier eta Aitziber Etxebeste eraginkorki gidatzeko ikastaroak ematen hasi dira. Udaletxeko langileak eta zenbait herritar izan dira lehenengo ikasleak.

Gutxiago kontsumitu, CO2 gutxiago jaulki, gidariaren erosotasuna gehitu eta segurtasuna gehitu errepidean. Horixe da eraginkorki gidatzea, Aitziber eta Asier Etxebeste Oiartzun Autoeskolako arduradunek definituta.

Euskadiko Plan Estrategikoaren baitan, profesionalei ikastaroak ematen hasi ziren, kontsumo eta kutsadura indizeak jaisteko.

Orain, profesionalen lana ikasitakoa herritarrei helaraztea da.

Kontzientzian eragin nahian

Udalarekin hitz egin ondoren, Agenda21ean kokatuta, eraginkorki gidatzeko ikastaroak ematen hasi dira.

«Jendearen kontzientzian eragin nahi da, eta zaila da askotan», aitortzen du Aitziberrek.

«Ohiturak aldatu behar dira», azpimarratu dute. «Ez diogu betiko gidatzeko modua txarra denik. Helburua ezberdina da».

Jakinaren gainean hitz eginez

Jakinaren gainean hitz egiten dute Etxebestetarrek. «Honela gidatzen hasi gara, eta nabaritzen da. 12-13 euro aurreztu ditzakezu bidaia batean», dio Asierrek.

Irakasteko orduan, «betiko moduan» erakusten dute autoeskolan. «Eraginkorki gidatzeko teknikak barneratzeko, autoa ezagutu behar da lehenengo», diote.

Ikastaro praktikoa

16 ikasle izan ditute Etxebeste anai-arrebek, udaletxeko langile eta partikularren artean.

Irailetik aurrera, ikastaroak ematen segituko dute.

Lau orduko ikastaroekin erakusten dute eraginkorki gidatzen. Teoria eta praktika uztartzen dituzte. Gainera, ikasle bakoitzari bere neurrira egindako aholkuak ematen dizkiete. «Ibilbide bat egiten dugu, bakoitzaren gidatzeko modua ikusteko», azaldu dute Oiartzun Autoeskolako arduradunek.

Interesatuek 943 494 095 telefonoan eman dezakete izena.