Oarsoaldeko Hitza

Opor aurreko azken udalbatzarra izan zen atzo. Bertan, besteak beste, azkenaldian hautsak harrotu dituen Niessen merkatal guneko antenaren gaia izan zuten eztabaidagai. Azkenean, ezker abertzaleko eta EB-Berdeen zinegotziak abstenitu egin baziren ere, gehiengo osoz atera zen aurrera telekomunikazio sareetako instalazio erradioleketrikoak arautzeko udal ordenantza.

Jose Manuel Ferradas EB-Berdeen bozeramailearen hitzetan, «Ordenantzako puntu batzuk zehaztu gabeak dira. Bestalde, herritarren parte-hartzea gehiago sustatu behar dela uste dut».

Iñaki Queralt ezker abertzaleko zinegotziak onartu zuen «araudia horrenbeste presaz onartu nahi izatea harritu zuela». Horrez gain, Ferradasek parte-hartzea bultzatu beharraren inguruan azaldutakoarekin ados azaldu zen, eta Gobernu Batzordeari hori ekidin nahi izatea egotzi zion, «bizilagunei Ingurumen Batzordean egotea eragotzita».

Queraltek, bestalde, araudia Donostiakoaren bera dela azaldu zuen, baina «eztabaidatu daitekeen puntu bakarra ebatsita. Ikastetxe bat antenatik 35 metro ingurura dagoelako». «Badakigu teknologia berriak garrantzitsuak direla, baina ezin da txeke txuri bat ordaindu», gaineratu zuen ezker abertzaleko zinegotziak.

Merino alkateak krontaesanak daudela erantzun zion. «Araurik ez zegoenean kexatu egiten zineten, eta orain badagoela, ere bai». Araudiaren inguruan honakoa esan zuen: «Araudi bat dago, bai, baina legea du gainetik, eta araundiak legea errespetatu behar du». Bestalde, EB-Berdeek eta ezker abertzaleko zinegotziek eskatutako epea luzatzea ez zuela beharrezko ikusten azaldu zuen Merinok. «Teknikarien informeak ez dela beharrezkoa dio. Bestalde, gaiaren inguruan zeozer esateko duten herritarrek eta politikariek alegazio bat aurkezteko aukera dute datozen bi hilabeteetan». Azkenean gehiengo osoz erabaki zen udalbatzarreko punturik eztabaidatsuena. Bukaeran, baina, bizilagun batek bere desadostasuna azaldu zion alkateari galderen eta eskaeren atalean.

Gainontzeko puntuak

Beste puntuak aho batez atera ziren aurrera. Hala nola, maiatzaren 30eko ohiko osoko bilkurari dagokion aktaren irakurketa eta onespena; posta, erabaki ofizialak, epaitegien epaiak eta lehendakaritzako kudeaketa; Añarbe onura publikoko mendian Jose Manuel Arbelaitz Mendiburu jaunarekin lur trukatzea eta Udalaren Araudi Organikoa aldatzea. Jesusen Bihotza Zahar Etxean barne-aldaketak egiten hasteko proposamenean, berriz, ezker abertzalea abstenitu egin zen.

Udalbatzarra hasi aurretik Errenteriako udaletxean 25 urte lanean daramatzaten, eta aurten erretiratu direnei oroigarri bana banatu zien Juan Carlos Merino alkateak.