Oarsoaldeko Hitza

Pildaineko Gizarte Zentroa eraikitzearen aurkako berraztertze helegitea onartu zuen herenegun Lezoko Udalbatzak. EAE-ANVren aldeko zazpi boto jaso zituen diktamenak. EAJk eta PSE-EEk ezezkoa eman zuten (guztira, 4 boto) eta EB-Berdeak koalizioa, berriz, (boto bat) abstenitu egin zen. Beraz, Udalbatzaren gehiengoarekin onartu zuten diktamena. EAE-ANV alderdiko Iñigo Esnaolak azaldu zuen Gobernu Taldearen iritzia :«Pildaineko proiektuak hainbat ziurgabetasun agerian utzi ditu, eta horren aurrean Gizarte Zentroa Auñamendin egitea egokiagoa iruditzen zaigu».

EAJko Kepa Garbizu ez zen iritzi horrekin ados azaldu: «Pildaineko Gizarte Zentroa oraindik ere posible dela uste dugu; Lezorentzako erabaki egokiena Pildaineko Gizarte Zentroa egitea da».

PSE-EEko Mikel Antxon Arrizabalagak, berriz, erabaki «politikotzat» jo zuen Pildaineko Gizarte Zentroaren aurkako berraztertze helegitea: «Makina bat urte daramatzagu Gizarte Zentroarekin eztabaidan, eta oraindik ez gara akordio batera iritsi. Berriro zerotik hastea ez zaigu ondo iruditzen; erabaki politiko bat da».

Ezker Batua-Berdeak koalizioko Roberto Sanchezek, azkenik, abstenitzea erabaki zuen: «Pildaineko kokagunea oso aproposa iruditzen zitzaigun, baina ez ginen zerbitzua pribatizatzearen alde. Beraz, abstenitu egingo gara».



Kreditu aldaketak

2008. urteko aurrekontuan kreditu aldaketak egitea onartu zuen Udalbatzak herenegungo saioan. Hain zuzen ere, 550.000 euroko kreditu aldaketak egingo dituzte. Horietatik 500.000 euro Gizarte Zentroaren proiektu berrirako bideratuko dituzte. EAE-ANVren aldeko zazpi botorekin eta gainontzeko alderdien ezezkoarekin onartu zuten diktamena.

Trafiko araudia

Lezoko trafiko araudia eguneratzea eta trafiko arloko isunen ordenantza berria indarrean jartzea ere onartu zuen herenegun Lezoko Udalbatzak.

«Lezok dituen trafiko arazoak konpontzeko zenbait neurri hartuko ditugu. Halaber, isunak eta arau-hausteak kudeatzen hasiko gara. Hori bai, isunak jartzeko garaian, Ertzaintzak baino zigor sozialagoak jartzeko ahalegina egingo dugu», azpimarratu zuen Jon Legorburu EAE-ANVko zinegotziak. Larritasunaren arabera, hiru mailatako isunak jarriko dituzte, 36, 92 eta 300 euro artekoak.

Diktamena EAE-ANV alderdiaren baiezko botoekin onartu zen. Gainontzeko alderdiak abstenitu egin ziren.

Jaizkibelgo lurren kudeaketaren helburuei buruzko udal akordioa eta Gipuzkoako Hiri Hondakinen Kudeaketa Planaren dokumentoari alegazioak jartzea ere onartu zuten heregungo udalbatzarrean.

Zinegotzi berria

EAJ alderdiko Enrique Figueroa Laboak zinegotzi karguari zin egin zion herenegungo saioan. Aurrerantzean hiru zinegotzi hauek izango ditu EAJk: Enrique Figueroa, Kepa Garbizu eta Jesus Maria Martiarena.