Oarsoaldeko Hitza

Bulgariako Dorkovo hirian ospatuko den Nazioarteko X. Folklore jaialdian Euskal Herriko ordezkari bakarra izango da Alkarkide dantza taldea.

Bulgariako Dorkovo herrian alajaina! Etxetik 2.700 kilometrora dantzan. Dorkovo hiria, Sofia hiriburuaren hegoaldean dago, 170 kilometrora, eta, esan bezala, Pasaiatik 2.700era. Etzi abiatuko dira bertara Alkarkide Alkartasunako Dantzari Ohiak. Nazioarteko X. Folklore Jaialdian parte hartuko dute.

Dorkovon hilaren 24rako egon behar du Alkarkidek, Euskal Herriaren ordezkari. Euskal Herriko folklorearen ordezkari, «kultura euskaldunaren eta herrikoiaren zati handi bat erakusteko».

Bidaia luzea izanik ere, autobusean egingo dute joan-etorria. Baina dena ez da lana izango, noski. Dorkoveko jaialdia lau egunekoa da, eta hainbat herrialdek hartuko du parte bertan. Jaialdia bukatuta, beste bost egun izango dituzte Alkarkidekoek Bulgariako txokoak ezagutzeko.

Denborarik ez

Hainbat jaialdiren artean Bulgariakoa aukeratu behar izan du Alkarkidek, eskaintza gehiago izan bazituzten arren. Egun faltagatik datorren urterako utzi dituzte beste jaialdi batzuetako gonbitak, hala nola, Errumaniakoa eta Normandiakoa.

Aurreko esperientziak

Euskal Herriko kultura zabaltzeko munduan zehar dantzan aritu izan dira lehen ere Alkarkide dantza taldeko kideak. Duela bi urte, esaterako, Istanbuleko (Turkia) V. Folklore Jaialdian hartu zuten parte. Istanbulen ere Euskal Herriko ordezkari bakarrak izan ziren.

Dantzari eta musikari artean, denera, 35 lagun joan zirenTurkia aldera. Guztien artean Gipuzkoako dantzak, Bizkaiakoak, Arrantzaleak, Katxarranka, Urdiain, Jaurrieta eta bestelako dantzak plazaratu zituzten. Turkiaraino joateko aukera 2005. urtean sortu zitzaien Alkarkidekoei. Izan ere, 2005. urteko uztailean Sarajevoko (Bosnia-Hertzegovina) VIII. Nazioarteko Folklore Jaialdian izan ziren, eta han egindako lan onaren ondorioz izandako harremanengatik jaso zuten gonbidapena.