Oarsoaldeko Hitza

Alkartasuna Euskal Dantza Taldeko kideak Portugalera doaz aste honetan. Hilaren 24an irtengo dira Antxotik Portugalgo Barcelos herrira bidean, autobusez, han egitekoa den Nazioarteko Folklore Jaialdian parte hartzera.

Hango talde baten gonbidapena jaso dute Alkartasunako kideek, eta, trukea egin asmo dute. Beraz, datorren urtean portugaldarrak herrian dantzan ikusteko aukera izango da. Oraindik, hala ere, ez dute hitzartu noiz etorriko diren portugaldarrak Antxora.

Alkartasuna taldeko dantzari Eneko Lillyk azaldu du bidaiaren helburua: «Euskal Herria eta Pasaia nazioartean ezagutarazi nahi dugu, gure kultura, dantza eta tradizioen bidez».

Nazioarteko dantzarien topagune

Alkartasunako kideak, Senegalgo, Kroaziako eta Venezuelako taldeekin batera arituko dira dantzan Portugalen. Hilaren 26an dute lehen emanaldia, Barcelos herrian. Hilaren 28an, gainontzeko dantza taldeekin batera, Galiziako Vigora joango dira, Coruxo herrira. Han dantzatuko dute bigarrenez Alkartasunakoek. Hilaren 29an, Portugalgo Barcelos herrian izango dira berriro eta beste emanaldi bat eskainiko dute Nazioarteko Folklore Jaialdiaren baitan. Abuztuaren 1ean bukatzen da jaialdia, eta egun horretan dantza herrikoiak aurkeztuko dituzte Alkartasunakoek.

Dantza eta irteera turistikoak uztartuko dituzte, eta abuztuaren 1ean itzuliko dira etxerantz.