Oarsoaldeko Hitza

Lezoko trafiko araudia eguneratzeko diktamena onartu du Lezoko Udalbatzak. Joan den osteguneko saioan hartu zuten erabakia, EAE-ANVren aldeko zazpi botorekin eta gainontzeko alderdien abstentzioarekin.

«Lezoko trafikoaren araudia eguneratzea beharrezkoa da. Gaur egungo legedira egokituko dugu. Halaber, trafikoa hobetzeko hainbat neurri hartuko ditugu», azpimarratu du Jon Legorburu zinegotziak.

Herriko trafikoa hobetzeko hainbat neurri hartuko ditu Lezoko Udalak. Udaltzaigotik jakinarazi dutenez, Altamira auzoko aparkaleku gabeziarekin bukatzeko neurriak edo erdiguneko trafikoa beste era bateko antolatzeko proposamenak aztertzen ari dira, besteak beste.

Isunen arloko ordenantza berria

Trafiko araudia berritzeaz eta eguneratzeaz gain, isunen arloko ordenatza berria onartu du Lezoko Udalbatzak.

«Isunak eta arau-hausteak kudeatzen hasiko gara. Hori bai, isunak jartzeko garaian, Ertzaintzak baino zigor sozialagoak jartzeko ahalegina egingo dugu», azpimarratu du Jon Legorburu EAE-ANVko zinegotziak.

Larritasunaren arabera, hiru mailatako isunak jarriko dituzte, 36 (arinak), 92 (larriak) eta 300 (oso larriak) eurokoak. Nolanahi ere, isunak jasotzen dituzten herritarrek deskontuez baliatu ahal izango dute.

«Isuna jaso eta hiru egun pasatu baino lehen ordaintzen dutenek %50ko deskontua izango dute. Alegia, isunaren erdia aurrezteko aukera emango diegu», azaldu dute Udaltzaingotik.

Izan ere, Lezoko Udalaren isunen arloko ordenantza berriaren helburua ez da jendea zigortzea, herritarren artean trafiko arloko hezkuntza sustatzea baizik.

«Neurri hauek guztiak herritar guztien trafiko hezkuntza hobetzeko baliagarriak izango dira», azpimarratu du Jon Legorburuk zinegotziak.