Oarsoaldeko Hitza

Arditurriko meategiak oraindik gehiago ezagutzeko aukera ireki da Udalaren, Gipuzkoak Foru Aldundiaren eta Arkeolanen bidez.

Hiru urterako hitzarmena sinatu dute OTASAk eta Arkeolanek meategietan indusketak egiteko eta erromatarren garaiko aztarnak aurkitzeko.

Duela hiru aste hasi ziren indusketak egiten Arkeolango kideak.

400 metro gehiago

Arkeologia eta espeleologia lanak gizarteratzea «garrantzitsua» dela azpimarratu zuen Mertxe Urteaga Arkeolango adituak.

Ekaina hasieratik ikusgai zeuden 200 metroko galeriez gain, orain, beste 400 metro ikus daitezke.

25 metro lurpean jaitsi ahal izango da Arkeolani esker. Bertan egiten ari diren indusketak ikusteko aukera ere badago.

Aurkikuntzak

Urteagak azaldu zuenez, «uste baino emaitza gehiago lortu ditugu hiru astetan». Hasiera batean uste baino garrantzitsuagoa izan zela Arditurriko meategia ere baieztatu dute. «Iberiar penintsulako bigarren meategi erromatar garrantzitsuena da», gehitu du Uriak.

Erromatar garaiko anfora eta kriseilu zatiak, egurra, ikatza edota animalien hezurrak topatu dituzte oraingoz.

Arkeologia lanak eta gizarteratzea, batera

Bigarren zati honetara bisita gidatuak ere martxan daude dagoeneko.

«Interes berezia duen jendeak bisitatu ahal izango du», azaldu zuen Aitor Etxeberria Oiartzungo alkateak.

Gipuzkoako Foru Aldundiko Ondare Kulturalaren zuzendari Pilar Azurmendi ere bertan izan zen. «Lehenengo aldia izango da indusketak eta gizarteratzea denbora berean egingo direnak, eta hori oso garrantzitsua da», esan zuen.

692.000 euroko aurrekontua

Proiektuaren aurrekontua 692.493 eurokoa da. Ia herena Gipuzkoako Foru Aldundiak jarri du. Gainontzekoa, Oiartzungo Udalak, Behemendik eta Eusko Jaurlaritzak jarriko dute.

Bisita gidatuak egiteko, aurretik eskatu beharko da ordua Turismo Bulegoan.