Oarsoaldeko Hitza

Karmengo Ama ikastetxeko

Apirilaren 29ko udalbatzarrean onartu bezala, Trintxerpeko maisu maistren etxebizitzen eraiste lanak hasi zituzten atzo. Bizilagunak lanak gelditzen saiatu ziren, eta salaketa jarri zuten Udalaren aurka, baina Udalak lanek aurrera egin behar zutela erabaki zuen.

Goizeko 08:00etan mazoaren soinuak esnatu zituen bizilagunak; hutsik zeuden etxeak eraisten hasita zeuden. Aztoratuta kalera irten ziren gertatzen ari zenaz ohartuta. Maisu maistren etxeetako bizilagunek bazekiten atzorako etxeak libre egon behar zutela, eta etxebizitza batzuk hutsik zeuden; baina beste hainbat bizilagun ez daude prest, nora joan eduki gabe, euren etxeak uzteko: «Bi urte daramatzagu beste bizitoki baterako eskubidea aldarrikatzen, baina ez digute irtenbiderik eman».

Bizilagunak bertan zeudela lanak hasteagatik, Udalaren aurkako salaketa jarri zuten goizean bertan. Langileek lanak gelditu zituzten, baldintza horietan lanik ezin zutela egin ikusita. Bizilagunetako bat ia zauritu zuten etxetik irteterakoan, hirugarren pisuko leihotik ate bat bota ostean. Ez zen ezbeharrik gertatu.

Udalaren eta eraikuntza enpresaren buruaren aginduz lanak aurrera jarraitu behar zuten. Arratsaldean ordea, langileak geldirik egon ziren. Gaur Udalaren salaketa enpresari ere zabalduko diote bizilagunek, agindurik gabe etxeetan sartu eta eraisten hasteagatik.

12 familia kalean

Maisu maistren etxebizitzetan 12 familia bizi izan dira, eta horietako batzuk 20 urtetik gora egin dituzte bertan bizitzen. Eraiste lanetarako ezarritako data baino lehen handik irten dira batzuk. Horixe da Galiziara itzuli den bizilagun baten kasua. «Bere borondatearen aurka eta egoera kaskarrean alde egin behar izan du», dio Mikel Alvarez bizilagunen ordezkariak.

Marina Valdesek etxean gelditu behar izan du: «Ama etxean daukat aldaka hautsita, nire ahizpa minusbaliatu psikikoa da, semeak haur eskizofrenia dauka... Zer egingo dut?»