Oarsoaldeko Hitza

Trintxerpeko Karmengo Amako maisu maistren etxebizitzak hutsik daude dagoeneko. Atzo arratsaldeko 16:00ak aldera bizilagunak etxeetatik atera zituzten udaltzainek. Etxeak eraitsi ondoren, eskola berria eraikiko dute zonalde horretan.

Herenegun bizilagunek lanak geldiarazi ostean, Udaltzaingoa joan zen atzo goizean goiz maisu maistren etxeetara. Jadanik inor bizi ez diren etxeak hustutzen hasi ziren, baina langileek uko egin zioten lanean jarraitzeari, bertan oraindik hainbat bizilagun egonik.

Ander Poza eta Iñaki Garmendia zinegotziak eguerdi aldera iritsi ziren etxebizitzetara bizilagunekin hitz egiteko asmoz. Ez zen egoera erraza izan bi aldeentzat, eta ez ziren etxeak hustutzeko akordiora iritsi. Azkenean, 16:00ak aldera Udaltzaingoak etxe guztiak hustu zituen,Ertzaintzaren laguntzaz.

Prozedura, «behar bezala»

Pasaiako Udalak bizilagunek egindako hainbat adierazpen zuzendu edo argitu nahi ditu. Hasteko, bizilagunek diotenaren aurka, Udalak eman beharreko pauso guztiak eman dituela dio. Alegia, etxebizitzak husteko prozesua «behar bezala» egin duela.

Bizilagunek ukatu egin dute Udalarekin harremana izana, Udalak jaramonik ez ei die egin. «Bizilagunekin harreman handia izan dugu, hitz egin dugu eta informazio guztia zuten,» esan du Maider Ziganda alkateak, ordea.

Zigandak gogorarazi duenez, bizilagunek bazekiten uztailearen 21erako etxeak hustu behar zituztela eta «orain arte izan dute alegazioak aurkezteko denbora». Udalak beste etxebizitza bat izateko eskubidea aztertu duela ere nabarmendu du alkateak. Udaleko perituen arabera, bizilagunei ez dagokie beste etxebizitzarik.

Azkenik, hamabi familia kalean geldituko direla gezurtatu nahi izan du Zigandak: «Bertan ez ziren hamabi familia bizi. Gainera, azken egunetan gehienek alde egin dute. Batzuk ez dira atera, baina izan dute alegazioetarako aukera».