Oarsoaldeko Hitza

Gaur iluntzean hasiko dira santioak Donibanen. San Inazio eguna bitartean jaietan murgilduko dira sanjuandarrak. Santio Eguna, Santa Ana, San Pantaleon, San Inazio... patroiez betetako festa egunak dira Donibanekoak, eta urteetako ohiturari jarraituz, Jai Batzordeak, egun horien inguruan atondu du jai egitaraua, oparoa.

Arratsaldeko lehen orduan hasiko dira gaur jaiei lotutako ekimenak. Meipiko jolastokian haurrentzako jolasak izango dira , eta handik irtengo dira erraldoi eta buruhandiak plazara bidean, txupinazoa ospatzeko. Urtero legez, barrutiko aiton-amonen ordezkariek izango dute suziria pizteko ardura. Ondoren, dantza egiteko aukera izango da, Erlaxi taldearen eskutik, plazan.

Santio Eguna

Biharko dute sanjuandarrek festetako lehen egun handia. Santio egunez urtero egiten den legez, sokamuturra izango da goizean, eta arratsaldean dantza solte txapelketa eta herri kirolen erakustaldia. Mugerza eta Bihurri eta Olasagasti Flores aizkolariek zutikako enborra moztuko dute. Etzandako hamar enbor moztuko dituzte baita ere, eta trontzan hamar mozketa egingo dituzte.

Horrez gain, Goenatxo eta Landarbide ariko dira harria altxatzen. Bakoitzak hiru harri altxatuko ditu, hirurak desberdinak.

Erakustaldia bukatzeko, Bihurrik aulki bat egingo du motozerrarekin.

Gazteek, gazteentzako antolatuak

Donibaneko jai egitarauan gazteek badute eskaintza. Biharko bertso afaria antolatu dute gazteek, Jokin Uranga eta Fredi Paya bertsolariekin. 10 euroren truke, Patxiku eta Remos tabernetan afarirako txartela eskuratzen dutenek, urdaiazpikoa, zainzuriak, txorizoa eta marmitakoa dastatu ahal izango dute Bonantzan.

Ondoren break dance saioa izango da, gazte txosnaren ondoan, Bonantzan baita ere, Intxaurbreak taldearekin.

Etzi, herri olinpiadak egingo dituzte gazte koadrilek plazan, 19:30etik aurrera. Festa giroan, nor baino nor arituko dira, ohiko jolasetan.

Azkenik, hilaren 30erako, Preso eta Errefuxiatuen Egunerako, Naizroxa eta Des-kontrol taldeen kontzertua antolatu dute. 00:30ean hasiko da musika jaialdia, Amnistiaren Arkuaren azpian.