Oarsoaldeko Hitza

Sokamuturra oso berezia da sanjuandarrentzat. Donibanen, herri guztietan bezala, zaila da ekimen baten inguruan pentsakera, adin edo joera ezberdinetako jendea biltzea. Baina Donibaneko sokamuturrak hori lortzen du; eta gehiago. Santiotan bi sokamutur izango dira; bata, atzokoa, Jai Batzordeko kideen esanetan «oso jendetsua eta emozioz bizia» izan zena. Bigarrena, San Inazio egunekoa, 08:00etan. Orduan Donibane kalera aterako da berriz ere, gozatzera.

Izan ere, atzoko jai egitaraua sokamuturrarekin hasi baitzen. Gaupasa egin zutenek zailtasunik gabe itxoin zioten bigantxen festaren hasierako suziriari; ez pentsa ohetik altxa zirenei gehiegi kosta zitzaienik jantzi eta kalera ateratzea.

10:00etan, berriz, Gaztelutxora Txirrindularitza Igoera egin zen, Vicente Carballesen omenez. Neska gaztetxoen kategorian Amaia Eguren izan zen irabazle, eta haren atzetik Lorea Etxabe eta Nagore Mertxan sailkatu ziren; gaztetxoetan ere, baina mutiletan, Urbil Fraile irabazke, eta atzetik, Julen Urtizberea eta Asier Oiarbide. Kadeteetan, berriz, Jon Mikel Alonso izan zen Gaztelutxoko bidean gora azkarrena, Ibon Lazaren eta Ander Lazaroren aurretik. Gazteetan, Aitor Sistiaga txapeldun, eta azkenik, helduetan, Jokin Aduriz (irabazlea), Ritxar Rivera eta Beñat Lekue onenak. Denera, 41 txirrindularik parte hartu zuten Donibane Zikloturista Elkarteak antolatutako proban.

Paellaren bueltan

11:00etan, Toka Txapelketa egin zen plazan. Bitartean, ordea, paella erraldoia egiteko prestaketetan hasi ziren sanjuandarrak Plazan. Ez da erraza, ez, 200 bat lagunentzako paella prestatzea, baina jakinduriarekin eta lasaitasunarekin, dena da posible: gustura gelditu ziren otorduarekin Plazan paella bazkaltzen izan ziren sanjuandarrak.

Arratsaldean, berriz, musa, Dantza Solte Txapelketa eta herri kirolak izan ziren Plazan. Afaltzeko, zer hoberik mokadua eta bertsoak uztartzea baino, bertso afarian. Eta eguna bukatzeko, break dance-a.

Gaur, Santioetako hirugarren eguna izango da, Santa Ana eguna hain zuzen ere. Ondoko koadroan agertzen da zein izango den gaurko jai egitaraua. Eguneko mugarri garrantzitsuenak, 11:00etako meza Santa Anan, 18:00etako KAE1 Ligako estropada, eta 22:30eko Habaneren ikuskizuna.

Danborradako entseguak

Itsas Mendi Elkartetik jakinarazi dute San Inazio eguneko danborradako entseguak astelehenean eta asteartean egingo direla, 20:00etan, pilotalekuan. Jendea entseatzera ager dadila eskatu dute. Izan ere, San Inazio eguneko danborrada (22:30ean hasiko da), ontzian egiten da, badiatik, eta parte-hartzaileek derrigor asegurua egin behar dute. Horregatik, datorren asteko entseguetan parte-hartzaileen izen-abizenak jasoko dira asegurua egiteko.