Oarsoaldeko Hitza

Kukai eta Tanttaka konpainiek, azaroaren 14ean, Hnuy illa ikuskizunarekin abiatu zituzten aurtengo Azpeitiako Antzerki Topaketak. Horrez geroztik, hamazazpi ikuskizun antzeztu dira Izarraitz pilotalekuan. Guztien artean ikusleek Kukai eta Tanttaka elkarlanean egindako Hnuy illa izan dela onena erabaki dute.

Horrenbestez, Kukai Dantza Konpainiak, abenduaren 21ean, Azpeitiako Udalak eskainitako sari hori jasoko du. Sariaren balio sinbolikoaz gain, 600 euroko diru saria izango du.

Kukaiko zuzendaria den Jon Maya pozik agertu da sari honen aurrean: «Atzo arratsaldean jakin genuen sariaren berri, eta beti ere poztekoa da ikuskizun baten bidea sari baten bidez apur bat gehiago finkatzea».

Ez da Kukairen ikuskizun batek sari bat eskuratzen duen lehenengo aldia. 2003. urtean 1937, gogoaren bidezidorretatik lanarekin Donostia Antzerki Saria jaso zuten, eta Max Sarietarako izendatuak ere izan ziren. Dena den, «sari hau ezberdina da. Guztiak ondo daude, baina erabakia ikusleek hartzen dutenean oraindik eta balio gehiago hartzen du sariak. Izan ere, kaleko jendeak, ikusle arruntak, erabaki du saria ematea, eta hori pozgarria da beti ere», dio Mayak.

Hnuy illa ikusteko hurrengo aukera etxetik gertu izango da. Urtarrilaren 10ean eta 11n Donostiako Victoria Eugenian izango da ikusgai, eta sarrerak dagoeneko salgai daude.